Финансиската стабилност на општините, продлабочувањето на децентрализацијата и новиот Стратегиски план 2026–2030 се во фокусот на втората седница на Генералното собрание на ЗЕЛС, изјави претседателот на ЗЕЛС и градоначалник на Скопје, Орце Ѓорѓиевски, пред почетокот на состанокот.
Тој посочи дека на седницата ќе се разгледаат клучни прашања поврзани со функционирањето на локалната самоуправа, како и идните иницијативи на здружението.
– Ќе дискутираме за она што сме го постигнале, до каде сме и каде ќе ги насочиме нашите активности во следниот период. Имаме нов Стратегиски план на ЗЕЛС 2026–2030, кој ги дефинира трите приоритети, лобирање пред централната власт, јакнење на административните капацитети и поддршка за електронските услуги – истакна Ѓорѓиевски.
Според него, најголемиот предизвик останува финансирањето на локалната власт.
– Бараме најмалку 10 проценти од ДДВ и 50 проценти од персоналниот данок, по примерот на европските општини. Без предвидливо финансирање не може да има реална децентрализација – рече Ѓорѓиевски.
Тој додаде дека, иако изминативе две години општините добиваат значајна поддршка од Владата за инфраструктурни проекти, потребно е системско решение што ќе обезбеди долгорочна финансиска самостојност, како и поголемо учество на локалната власт во БДП.
Во однос на децентрализацијата, Ѓорѓиевски нагласи дека ЗЕЛС веќе подготвува модели за преземање надлежности во социјалната заштита.
– Општините најдобро ги познаваат потребите на граѓаните и затоа е логично тие да имаат поголема улога во овој сегмент-истакна Ѓорѓиевски.
Како една од приоритетните области ја посочи и противпожарната заштита, информирајќи дека средствата за територијалните единици се зголемени, но дека состојбата и понатаму бара сериозни интервенции.
– Во пресрет на летната сезона формиравме кризен штаб за подобра координација на опремата и човечките ресурси во итни ситуации – рече Ѓорѓиевски.
Градоначалникот информираше дека од почетокот на годината во Бригадата за противпожарна заштита на Скопје Градот примени се 20 нови пожрникари, а до крајот на годината ќе бидат примени уште 20, што според него во една година до сега не биле примени 40 нови пожарникари.
На седницата ќе се отвори и прашањето за состојбите во јавните комунални претпријатија, каде, како што посочи, клучни проблеми се долговите, опременоста и кадровските капацитети.
Генералното собрание на ЗЕЛС е највисокото тело во Заедницата кое има вкупно 90 делегати, сите градоначалници во земјава и 9 члена на Комитетот на советите при ЗЕЛС, тело при ЗЕЛС составено од општински советници.
