Членовите и претседателот на Комисијата за европски прашања денеска остварија средба со Фернандо Маријано Сампедро Маркос, државен секретар за Европската Унија на Кралството Шпанија, информира собраниската прес-служба.
Претседателот на Комисијата и потпретседател на Собранието, Антонијо Милошоски, изразил задоволство што Шпанија посветува сѐ поголемо внимание на политиката на проширување на Европската Унија. Тој нагласил дека особено се цени континуираната поддршка што Шпанија ѝ ја дава на европската перспектива на земјава и на политиката на проширување на ЕУ.
Во тој контекст, Милошоски истакнал дека треба да се искористи актуелниот моментум за напредок во процесот на проширување, паралелно со Украина и Молдавија, преку отворање на преговарачките процеси. – Проширувањето ќе биде вин-вин ситуација во насока на обединета Европа, рекол Милошоски.
Тој додал дека од Шпанија, како влијателна земја членка на Европската Унија, се очекува поддршка во надминувањето на билатералниот спор со Бугарија, преку изнаоѓање решение од заемна корист за двете страни.
Шпанскиот државен секретар ја потврдил поддршката за полноправно членство на нашата земја во големото европско семејство, истакнувајќи дека процесот треба да се темели на заслуги, исполнување на критериумите и почитување на европските вредности.
Присутните биле согласни дека средбата претставува само уште една потврда на одличните пријателски односи на двете земји, како и на заедничката определба за продлабочување на соработката, преку размена на искуства, добри практики и дијалог, со интензивни меѓусебни посети и заеднички активности во повеќе области.
