Министерот за надворешни работи и надворешна трговија, Тимчо Муцунски, денеска оствари средба со заменик-потсекретарот за внатрешни работи на Соединетите Американски Држави, Џон Гоунтанис, а во фокусот на разговорот беа тековните активности поврзани со имплементацијата на билатералните приоритети и цели договорени на Втората сесија на Стратешкиот дијалог меѓу владите на Македонија и Соединетите Американски Држави, одржана во април годинава.
Како што информираат од Министеството за надворешни работи и надворешна трговија, соговорниците ја потврдиле заедничката посветеност за натамошно унапредување на соработката во областите од заемен интерес, во насока на понатамошно продлабочување на стратешко партнерство меѓу двете земји.
Особено внимание било посветено на енергетската и инфраструктурната отпорност, економската и трговската соработка, сајбер-безбедноста, миграциските прашања, како и на заедничките активности за сузбивање на организираниот криминал и нелегалната трговија со дрога и други наркотични средства.
Во таа насока била нагласена важноста од континуирана координација и интензивирање на заедничките активности за спроведување на договорените иницијативи, во согласност со заедничките стратешки интереси на двете земји.
