Незаконските решенија со кои полициски службеници се распределуваат на работа надвор од местото на живеење подолго од шест месеци на начин на кој што министерот Спасовски ги дели со години, државата ја чинат милиони евра, народни пари. Ова денеска го изјавија од Синдикатот на Полицијата во Македонија, откако Апелациониот суд потврдил неколку правосилни пресуди по тужби на обесправени полициски службеници, а кои судски се докажувале и по неколку години. Со ова тие прогласија правна победа и побараа итно стопирање на оваа незаконска пракса на министерот..
„Согласно ЗВР и КД, сите оние кои кои се распоредени надвор од местата на живеење, односно во друга општина, можат да бидат распоредени максимум шест месеци. Правниот основ е според член 113, а не како во сегашната пракса во решенијата според член 111 од ЗВР…Признавајте ги и исплаќајте ги правата на работниците, немојте да правите штета на буџетот во МВР – рече Орце Коцевски, претседател на Синдикатот на Полицијата во Македонија.
Неофицијално, досега биле издадени неколку илјади вакви незаконски решенија. Љупчо Мицевски е еден од нив. Тој е полициски службеник кој веќе две години работи во ПО во Ропотово, општина Долнени, иако живее во Прилеп. Тој секојдневно патува и вели дека не добива никакви надоместоци, зарди што тужел, а и добил.
„Пресудата што ја имаме добиено на Апелациски суд е дека е незаконско прераспоредувањето и за патните трошоци дека треба да се исплаќаат доколку некој полициски службеник е распределен надвор од местото на живеење..Покрената беше судска постапка, истата е финализирана и се надевам дека МВР ќе ја испочитува, не само мојата, туку и од останатите полициски службеници кои се надвор од местото на живеење ќе бидат вратени во своите општини, во својот град, да работат во своите ПС“, – изјави Љупчо Мицевски, прераспределен полициски службеник.
Од Синдикатот на Полицијата во Македонија, побараа и итно стопирање на праксата за давање писмени наредби подолго од 30 дена. Во спротивно, се заканија дека ќе побараат одговорност пред сите надлежни институции, бидејќи, како што велат, сега во МВР не постоело ниту ред, ниту правда, ниту професионализам.
Каролина Дурло
