На Земјоделскиот факултет при Универзитетот „Гоце Делчев“ (УГД) во Штип денеска се одржа меѓународна работилница посветена на испитувањето на аромите во храната и пијалаците. На работилницата учествуваат домашни и странски предавачи и учесници од повеќе европски држави. Универзитетскиот професор Зоран Поповски вели изборот на работилницата да се одржи во Штип е резултат на активното учество на Универзитетот „Гоце Делчев“ во европските COST акции.
-Значењето е во неколку работи, значи ние во овој момент сме една од најпрестижните држави со околу 92 отсто опфатна научна популација во кост акции. Втора работа е тоа што добивме три кост акции како предлагачи, односно како носители на тие акции. Во изминатите 24 години сме имале само две, а оваа година добивме три такви акции. УГД е една од институциите и како Универзитет, но и факултетот од поактивните членови, навистина имаат големо учество и веројатно, тоа била причината, за менаџментот на оваа акција да се определи оваа работилница да ја организираат во Штип-рече Поповски.
На работилницата учествуваат експерти од седум европски држави. Гостите ќе имаат можност да дегустираат македонски вина и храна.
-Почестени сме и навистина сме горди што го организираме овој настан на земјоделскиот факултет. Работилницата е посветена на сензорна еваулација и аналитичка карактеризација на храна, која е што базирана на растителни протеини и на пијалоци. Во рамки на работилница ќе имаме мастерс клас на македонски вина. Гостите од страна ќе имаат можност да се запознаат со македонсктие вина, да дегустираат македонската растителна храна, која е тема и ќе имаме предавање од експерти од седум држави-изјави Виолета Иванова Петрополус, професор на Факултетот за земјоделски науки-Штип.
Професорката Барбара Сигмунд од Универзитетот за технологија во Грац вели дека малите групи овозможуваат подобра комуникација и соработка.
-Добра можност за средби и работа во мали групи, имаме околу триесетина учесници , и одлична можност да се измешаат професори и, што е уште поважно, млади научници. Ваквите мали групи овозможуваат ефикасна комуникација и интеракција, која не е можна на поголемите конференции- вели Сигмунд.
Инаку, претставниците на факултетот за земјоделски науки посочија дека ваквите меѓународни средби се значајни за поврзување на научниците и размена на искуства.
