Претседателот на македонското друштво „Илинден“ – Тирана, Никола Ѓурѓај и градоначалникот на Прилеп, Дејан Проданоски разговарале околу поддршката што оваа општина може да ја даде за друштвото и унапредувањето на соработката во областа на културата.
-Чест и задоволство ми беше што со градоначалникот имавме срдечна средба. Непосредно го запознав со проблемите со кои се соочуваат Македонците, како и со активностите на друштвото. Добив цврста поддршка за друштвото, во рамки на можностите на локалната власт- објави Ѓурѓај.
Додаде дека размениле мислење околу соработката на културен план, со настапи на македонски фолклорни групи од Албанија во Прилеп и обратно.
-Му заблагодарив исто така за грижата кон учениците и студентите Македонци од Албанија, кои се школуваат во образовните институции во Прилеп- посочи Ѓурѓај.
На Проданоски му донирал примероци од изданијата на македонскиот весник „Илинден“, кој е „главниот и битен гласник кој информира за активностите, проблемите и прашањата на Македонците во Албанија“.
