Почна проширувањето на патот меѓу населбите Баби и Стар Караорман, односно делница кои ги поврзува општините Штип и Карбинци. Градоначалникот на општина Штип, Иван Јорданов попладнево изврши увид во градежните работи и посочи дека жителите кои транзитираат по овој пат со години бараат негово проширување, изградба на тротари и поставување на улично осветлување, заради поголема безбедност на сите учесници во сообраќајот.
-Имавме доста голем безбедносен ризик за сите учесници во сообраќајот и за пешаците, но и за управувачите на автомобили кои транзитираат и возат во овој дел. И дополнително, она кое што го планираме како локална самоуправа е проширување, делумно проширување на патот, затоа што согласно стандардите, овој патен правец има потреба од проширување за безбедно движење на автомобилите и користење на оваа сообраќајница – изјави Јорданов.
Тој посочи дека вкупниот финансиски износ кој е обезбеден од парите на граѓаните,односно од буџетот на Општината е 7 милиони денари. Проектот ќе се реализира на три фази.
– А еве денес, како што напоменав, најпрво ќе се полага кабел, односно електрика, подоцна ќе се третираат тротоарите, ќе се осветлува потегот, за на крај се изасфалтира она проширување кое е исто така предвидено на овој патен правец. Етапно работиме, она кое што е наша крајна цел е да обезбедиме соодветен сообраќај со можност безбедносно движење на пешаци и на автомобили на овој потег помеѓу населба Баби и населба Караорман и соодветно поврзување помеѓу општина Карбинци и општина Штип – подвлече Јорданов.
