Општина Василево постави ново лед паметно улично осветлување во населените места Радичево и Дукатино, со што Општината има целосна покриеност со вакво современо и, пред се, економично и енергетски ефикасно улично осветлување, објавија од локалната самоуправа.
Во пренесената изјава на градоначалникот Славе Андонов, се наведува дека ова е едно од неговите ветувања пред граѓаните на овие населени места, кое сега е целосно реализирано.
-Ова беше мое ветување пред граѓаните на Радичево и Дукатино – денес тоа е реализирано. За жал, овие две населени места беа единствените во Општина Василево што не добија лед улично осветлување од претходното раководство. Денес ја исправаме таа неправда и инвестираме рамномерно во секое населено место, стои во изјавата на Андонов.
Тој најавува континуитет во инвестициите во сите населени места чиј краен резултат ќе биде поквалитетни услови за живот за сите граѓани.
