Општина Чаир започна со реализација на платформата „Чаир во ритамот на здравјето“, преку превентивни активности посветени на заштитата на здравјето на граѓаните во периодот на високите летни температури, информираат од Општината.
Активностите се реализираа во Паркот на Чаир, Паркот „Младина“ и во Старата чаршија, каде медицинските тимови вршеа основни здравствени прегледи, мерење на крвниот притисок, мерење на нивото на шеќер во крвта, како и даваа стручни совети и делеа информативни материјали за заштита од високите летни температури.
Во рамки на акцијата, претставници на Општина Чаир, во соработка со Црвениот крст, делеа и шишиња со вода на најфреквентните локации, со цел поттикнување на хидратацијата и спречување на последиците од високите температури.
Платформата „Чаир во ритамот на здравјето“ ќе продолжи и во наредните денови со нови активности насочени кон промоција на здравјето, превенцијата и подобрувањето на квалитетот на живот на граѓаните.
