Во рамки на Програмата за изградба, реконструкција и одржување на јавното осветлување за 2026 година, Општина Берово започна со обнова на уличното осветлување во селото Смојмирово, каде што постојните светилки се заменуваат со нови ЛЕД енергетски ефикасни светилки.
Според градоначалникот на Општина Берово, Петар Ружински, активностите се дел од континуираните инвестиции за подобрување на комуналната инфраструктура во сите населени места на територијата на општината.
-Со поставувањето на современо ЛЕД осветлување обезбедуваме поквалитетно и порамномерно осветлување на јавните површини, поголема видливост во вечерните часови и повисоко ниво на безбедност за пешаците, учесниците во сообраќајот и жителите на селото- истакна Ружински.
Од Општината информираат дека новите ЛЕД светилки имаат значително подолг работен век, бараат помалку одржување и овозможуваат посигурно функционирање на системот за јавно осветлување. Дополнително, примената на ЛЕД технологијата ќе придонесе за намалување на потрошувачката на електрична енергија и порационално користење на јавните средства.
Локалната самоуправа најавува дека и во наредниот период ќе продолжи со реализација на проекти насочени кон модернизација на комуналната инфраструктура, со цел создавање побезбедни, поуредени и поквалитетни услови за живот на граѓаните во сите населени места на Општина Берово.
