Општина Валандово од денеска почнува со најавената реконструкција и изградба на улици во повеќе населени места, соопштија општинските власти. Според информациите од надлежните, почетокот на градежните работи ќе се означи со гребење на главната улица во село Раброво.
Обновата на улици на подрачјето на Општината е дел од проектот за подобрување на локалната патна инфраструктура кој локалната самоуправа го спроведува преку инвестиција на Министерството за транспорт во вредност од 65,5 милиони денари.
Во рамки на проектот освен во Раброво, ќе се изведуваат градежни работи и во Собри, Марвинци, Брајковци и Пирава, а согласно утврдената динамика, реализацијата треба целосно да заврши до крајот на октомври.
Од Општина Валандово информираат дека согласно дополнетата Програма за асфалтирање и одржување на улици, ќе се работи и на изградба и подобрување на локалната патна мрежа во Грчиште, Казандол, Јосифово, Калково и други населени места.
Според надлежните, инфраструктурните зафати ќе продолжат и во текот на следната година, кога се планирани инвестиции во останатите населени места во Општината.
