В година ќе бидат готови првите километри од автопатот Тетово – Гостивар, кој според сегашната динамика ќе биде целосно готов во 2028, а работиме и на железничко поврзување на Скопје со Албанија како продолжение на активностите од проектот „Градски воз“ – информира денеска вицепремиерот и министер за транспорт, Александар Николоски.
– Добро оди изградбата на автопатот Тетово – Гостивар. Тоа е автопат што го почна оваа Влада, решени се сите прашања поврзани со експропријацијата, сега се решаваат работите што се поврзани со дислокација на водови. Исто така, не сакаме да го отсечеме населението од едната или другата страна на автопатот и затоа паралелно се работат натпатниците, односно мостовите и, дополку продолжиме со оваа динамика, веќе в година ќе ги видиме првите завршени километри, а до крајот на 2028 година целосно ќе биде завршен автопатот од Тетово до Гостивар и тоа е нешто на што особено се гордеам – изјави Николоски при посетата на општина Тетово.
Тој информира дека заедно со Европската Унија, во рамките на планот за раст, веќе интензиво се работи на документација за железничко поврзување на Скопје со Тетово и Гостивар во прва фаза, со Кичево во втора, а во трета фаза со Охрид, Струга и Република Албанија.
– Мојата идеја е еден вид сон да направиме меѓуградски возови, нешто што многу ќе го растовари сообраќајот, ќе ги намали метежот и загадувањето. Интензивно се работи тој проект и се надевам дека веќе в година ќе можеме да ги видиме првите конкретни работи и за неколку години да може за половина час да се оди од центарот на Тетово до центарот на Скопје со едно пријатно возење – рече Николоски посочувајќи дека овие активности ќе бидат продлжение на прокетот „Градски воз“ во рамките на Скопје.
