Вечерва на програмата на „Кривопаланечко културно лето“ познатата македонска етно-фолк пејачка, Елена Андоновска, ќе одржи солистички концерт насловен „Од Македонија во туѓина“, посветен на доајенот на македонската народна песна, Васка Илиева.Концертот е закажан за 20 часот и 30 минути, а од општината ги покануваат сите граѓани да уживаат во настанот со кој македонската народна песна повторно ќе заживее во својот најавтентичен сјај.
-Вечерва граѓаните на Крива Паланка и сите посетители имаат можност да уживаат во настапот на познатата македонска етно-фолк пејачка Елена Андоновска,која ќе го одржи својот солистички концерт „Од Македонија во туѓина“, музички спектакл посветен на доајенот на македонската народна песна, Васка Илиева. Публиката ќе има можност да ужива во внимателно осмислена концертна програма, во која Андоновска ќе ги изведе најубавите, најемотивните и најпознатите песни од богатиот репертоар на Васка Илиева. Секоја композиција ќе биде потсетник на богатото македонско музичко наследство и на вредностите што со генерации се пренесуваат преку народната песна. Општина Крива Паланка ги поканува сите љубители на македонската народна музика да бидат дел од овој уникатен музички настан и заедно да ѝ оддадат почит на легендата чие творештво претставува едно од најголемите богатства на македонската музичка традиција – наведуваат од Општината.
Оттаму нагласуваат дека концертот „Од Македонија во туѓина“ не е само музичка вечер, туку проект со силна културна и национална порака: да се зачува, негува и афирмира македонската традиција, да се оддаде заслужена почит на една од најголемите музички легенди и да се поттикнат новите генерации да ја продолжат љубовта кон народната песна.
