Луѓето ќе бидат среќни и задоволни кога наместо на забави во Дубаи и јахти на Паљури, ќе ве видат во затвор, му порача премиерот Христијан Мицкоски на лидерот на СДСМ Венко Филипче, одговорајќи на пратеничко прашање. Од собраниската говорница првиот човек на социјалдемократите, коментирајќи ги двете години работа на Владата, реши да ги повтори веќе слушнатите пораки од партиската говорница, а една од нив е дека младите се иселувале.
-Секој трет човек планира да ја напушти државата, не затоа што не ја сака Македонија, туку затоа што не гледа можност тука да живее и да напредува, порача Филипче.
-Затоа што ве гледаат вас во Дубаи како уживате на Харис Џиновиќ, а не сте во затвор, затоа што гледаат таму поранешни функционери како уживаат на јахти, а не се во затвор. Поминаа две години, а вие уште уживате на јахтите во Паљури, наместо на друго место, признавам дека сум виновен. Но, исто така еве ви ветувам, ви ветувам ве гледам во очи и ви ветувам дека нема повеќе да ги разочаруваме македонските граѓани и да гледаат слики како поранешни функционери уживаат на јахти и во мелосот на Харис Џиновиќ, му врати Мицкоски.
Иако и од Брисел ја прогласија Македонија за лидер во реформската агенда, според Филипче не било така, Владата го користела грејс периодот кој го имала од Европската Унија. Мицкоски порача дека Македонија работи на домашната задача, а на својот пат го има спорот со Бугарија, на која од голема помош и биле и политичарите од македонската опозиција.
-Имаме проблем и се обидуваме од петни жили да го решиме проблемот и покрај тоа што имаме квинсинлзи дома, кои што се обидуваат од внатре да ги нарушат позициите на оваа Влада. И кога тоа го гледа спротиставената страна, логично е да рече кога ги има оние квинслинзи таму кај нив, што има ние да се мачиме со нив, порача Мицкоски.
На седницата за пратенички прашања, премиерот Мицкоски истакна дека има информации оти соседна земја лобира кај Европската Унија за намалување на финансиската поддршка за Македонија, односно за скратување на европските фондови. Според него, ваквиот пристап би требало да ја забави земјата во нејзиниот развој и да ја доведе во тешка економска состојба, со цел да биде принудена да прави отстапки и да прифати одредени барања под притисок.
Премиерот е сигурен и дека повторно Македонија ќе биде прва и во јунското мерење на напредокот, односно дека државата има најголема испорака на реформи и чекори кои се дел од реформската агенда.
Матеја Петровски
