Заменик-министерот за здравство, Јовица Андовски, градоначалникот на Општина Кичево Александар Јованоски и директорката на Општа болница Кичево, Маја Цветановска Трајковска, заедно со делегација на Светска банка, денеска ја посетиле болницата во Кичево и го разгледале концептот за изградба на нова болничка установа.
Како што соопшти Министерството за здравство, планираната инвестиција е проценета на околу 1,38 милијарди денари, односно 22,5 милиони евра.
-Кичево со децении се соочува со несоодветни болнички услови. Време е овој проблем да добие трајно и функционално решение. Целта е граѓаните да добијат сигурна здравствена грижа во својот град, а здравствените работници современи услови за работа – изјави Андовски.
Новиот комплекс ќе располага со современи простории за дијагностика, болничко лекување и ургентна нега, системи за медицински гасови и енергетски ефикасни решенија.
Од Министерството додаваат дека болницата ќе обезбедува услуги за Општина Кичево, како и за населението од околните места, со што ќе се намали потребата пациентите да патуваат во Скопје, Охрид и Битола.
-Новата болница треба да стави крај на долгогодишната неизвесност и да обезбеди трајно здравствено решение за Кичево и околината, стои во соопштението на МЗ.
