Неколку граѓани од Општина Липково поднеле барања до Комисијата за проценка на штети по силното невреме што зафати делови од државата, меѓу кои и оваа општина од североисточниот регион.
– Имаме пријави за штети предизвикани од паднати бандери и дрвја врз автомобили, но најмногу за штети на земјоделски обработливи површини – изјави секретарот на Општина Липково, Нухи Ајдини.
Од Општината ги повикаа сите граѓани кои претрпеле штети од невремето да ги пријават до формираната Комисија за проценка на штети.
– Барањата ќе бидат разгледани, а важно е при нивното поднесување да биде приложена потребната документација – додаде Ајдини.
Комисијата ќе ги разгледа сите пристигнати барања и ќе изврши проценка на пријавените штети согласно законските процедури.
