Собранието во следните неколку денови интензивно ќе работи на носење на законите поврзани со реформската агенда, информира денеска на средба со новинарите претседателот на законодавниот дом Африм Гаши.
– Во однос на реформската агенда знаете дека 30 јуни е краен рок за гласање на законите од реформската агенда. Најголемиот дел од агендата на Собранието е организирана околу достигнување на тие рокови. Денеска имаме седница за пратенички прашања, утре ќе имаме седница, во понеделник најверојатно ќе свикаме нова седница, така што до 30 јуни ќе гледаме да поминеме се што доаѓа како предлог од Владата и од пратеници, а што е поврзано со реформската агенда – рече Гаши.
Што се однесува до седницата за реконструкција на Владата, ќе биде закажана кога предлогот ќе биде доставен до Собранието.
Ребалансот на Буџетот е веќе доставен во Собранието, а согласно процедурите се очекува тој да биде донесен кон крајот на јули.
Претседателот на Собранието оцени дека средбата со неговата бугарска колешка во Софија Михаела Доцова што се одржа на маргините на состанокот на Партнерството за соработка во југоисточна Европа поминала во многу позитивна атмосфера. Тој ја поканил Доцова во официјална посета на земјава и очекува дека тоа би можело да се реализира во текот на годинава.
– Воглавно разговаравме за соработката на нашите два парламенти, како може да ја продлабочиме соработката во процесот на евроинтеграција, како да најдеме начин да ги црпиме искуствата од бугарското зачленување во ЕУ… – рече Гаши.
За законот за соодветна и правична застапеност, претседателот на Собранието одговарајќи на новинарско прашање рече дека е избран најдобриот начин како може да се донесе еден закон.
– Законот почна како што е предвидено во деловникот и во редовна процедура. Имаше јавна расправа со сите чинители, би рекол. Исто така заседаваше и комитетот, одлучивме за потребата за носење на законот во Бадентер. Го помина првото читање, потоа законот е на комисиска расправа, се разгледуваат амандманите. Се надевам дека на почетокот на идната недела ќе биде завршена амандманската расправа и штом биде завршена, тој предлог — дали ќе биде дополнет или истиот ако не се прифати ниту еден амандман, тоа зависи од расправата во Комисијата за политички систем — тогаш ќе дојде на второ читање на пленарна седница и се надевам дека ќе се прифати од страна на мнозинството на пратеници – рече Гаши.
За критиките на албанската опозиција, рече дека негова оценка е дека нема перфектен закон. – Но помеѓу немање закон и имање и носење на закон кој е осмислен добро, на кој се работи две години, каде е вклучена голема експертска јавност, каде што е вклучена целата јавност, каде што се изјасни и Венецијанската комисија… мислам дека ова е најдобриот начин како може да се донесе еден закон – рече претседателот на Собранието.
Според него, повеќето од забелешките се прејудицираат или хипотетички се поставува прашањето дека ова решение не би можело да функционира како што треба, но тој вели дека законот предвидува систем којшто ќе ја следи процентуалната и правичната застапеност на граѓаните во однос на вработувањата во јавниот сектор.
- Јас би сакал законот да функционира перфектно, но ако има негде некоја забелешка при процесот на имплементирање на тој закон, тука сме во Собранието, ќе направиме промени. Но однапред целиот закон да го прејудицирате, мислам дека не е во ред. Јас не се согласувам со тој пристап – рече Гаши.
