И Прилеп се вброи меѓу 16-те општини каде што и официјално функционира дигитален Центар за е-услуги. Граѓаните и правните лица на едно место можат да добијат околу 350 различни административни услуги, и тоа веднаш или за многу кратко време.
Според ресорниот министер, целта на овие услуги не е само процесот на дигитализација, туку пред сè побрза, поефикасна и потранспарентна услуга за секој граѓанин, особено за повозрасните, на кои дигиталната писменост им претставува поголем предизвик.
„Најкористени услуги на Порталот во моментот ни се изводите од Матичната книга на родените, венчаните и умрените, кои се добиваат за многу кратко време. Уверението за државјанство се добива веднаш, како и потврдите за неосудуваност, кои исто така се издаваат за многу кратко време. Така што една палета од најкористените административни услуги за граѓаните е достапна на Порталот, а секако и во Центарот за е-услуги тука во Прилеп“, изјави Стефан Андоновски, министер за дигитална трансформација.
Во изминатите два пробни месеца, околу 200 граѓани побарале различни услуги преку овој Центар, што, според градоначалникот, е сериозен показател дека прилепчани имаат потреба од ваков вид, условно кажано, „посредништво“.
„Сметаме дека ова е добар чекор за подобрување на функционалноста на институциите и за промоција на услугите што Министерството ги нуди преку Платформата за е-услуги. Ова е заеднички проект – ние обезбедивме простор во нашиот едношалтерски систем, со крајна цел граѓаните преку едно место да имаат пристап до сите услуги што ги нудат и локалната самоуправа и централните институции“, посочи Дејан Проданоски, градоначалник на Прилеп.
Според министерот Андоновски, до крајот на годинава е планирано да се отворат уште пет вакви центри, со што речиси целата територија на државата ќе биде покриена со вакви центри.
Инаку, минатата година Светската банка, според Индексот за дигитализација, ја вброи Македонија во категоријата „А“, што значи дека земјата е во групата дигитално развиени држави.
