Борбата против корупцијата е високо на агендата на приоритети за пристапување на земјава во Европската унија, но тоа не е битка само на еден сектор, неопходна е соработка на сите страни, порачаа учесниците на денешната конференција „Зајакнување на деловниот интегритет преку јавно-приватна соработка“ во организација на М6 Едукативниот центар.
Францускиот амбасадор во земјава Кристоф ле Риголер со порака дека борбата против корупцијата е важна сама по себе и од неа придобивки ќе има целото општество.
– Борбата против корупцијата не е нешто што се бара, туку е нешто што е важно само по себе, затоа што е важно за граѓаните. На крајот на краиштата, тоа значи дека станува збор за загуба на пари коишто може да се вложат во изградба на болници, училишта, патишта и слично. Се на се, спречувањето на корупцијата е важно за целото општество – вели Риголер.
Борбата против корупцијата не е битка која може да ја води само еден сектор, потребна е соработка меѓу јавните институции, граѓанските организации и академскиот свет, порачуваат од Францускиот антикорупциски фонд кој спроведува антикорупциски проект во Северна Македонија, Молдавија и во Црна Гора.
– За зајакнување на деловниот интегритет потребна е соработка мегу јавниот и приватниот сектор и тука јавните институции играат клучна улога затоа што тие поставуваат јасни правила кои овозможуваат да се воспостават процеси коишто ќе креираат конкуренција и ќе ја зајакнат соработката со приватниот сектор – вели Хелена Папа од Францускиот антикорупциски фонд.
Од македонската Влада велат дека борбата против корупцијата е еден од прироитетите на коишто работат. Министерот за дигитална трансформација Стефан Андоновски со оценка дека има напредок во сферата на дигитализацијата која е еден од превентивните процеси во борбата против корупцијата.
– Дигитализацијата како процес ја превенира корупцијата на најниско можно ниво со тоа што ги автоматизира процесите, но исто така може и да открива корупција кога станува збор за високи случаи на поврзување на регистри и поврзување на институции преку платформата за интероперабилност. Изминатиот период направивме крупни чекори – над 90 институции веќе се поврзани на плафтормата за интероперабилност, а дигитални услуги имаме повеќе од 320 што значи дека се бориме на два начини против корупцијата внатре во администрацијата – изјави Андоновски.
Во борбата против корупцијата важен фактор е и приватниот сектор, сметаат од Антикорупциската комисија од каде апелираа побрзо да се донесе националната петгодишна стратегија за спречување на корупцијата.
– Како Комисија имаме надлежности во промовирање во интегритетот во јавниот сектор, но интегритетот само во јавниот сектор не е доволен, треба дополнително да се отвори дискусија и со приватниот сектор кој е од другата страна, рече претседателот на Антикорупциската комисија Адем Чучуљ.
