Претседателот на Стопанската комора на Македонија Бранко Азески учествуваше на дебатата за проширување на Европската Унија организирана од Европскиот економско-социјален комитет (ЕЕСК), на која присуствуваа повеќе од 500 претставници на институциите, бизнис-заедницата, социјалните партнери и граѓанското општество од земјите членки на ЕУ и од земјите кандидати.
Како што соопшти Стопанската комора, дебатата ја отворија претседателот на ЕЕСК, Шејмус Боланд и еврокомесарката за проширување, Марта Кос, која во своето обраќање истакна дека проширувањето останува еден од клучните стратешки приоритети на Европската Унија, со посебен акцент врз безбедноста, економскиот раст, подготвеноста на земјите кандидати и врз социјалната кохезија.
Во своето обраќање Азески нагласил дека на дебатата настапува како претставник на приватниот сектор од Западен Балкан. Тој посочил дека, според истражувањата, повеќе од 90 отсто од компаниите во регионот сметаат дека корупцијата, сивата економија и нефункционалната администрација и натаму се меѓу најголемите пречки за развој на бизнисот.
Дополнително, Азески укажал на предизвиците поврзани со недоволно развиената гасна и транспортна инфраструктура, како и на потребата од поефикасно функционирање на правната држава како предуслови за забрзување на економскиот развој и на европската интеграција на регионот.
Азески истакнал дека интеграцијата на Западен Балкан треба да биде проследена со конкретни реформи што ќе создадат предвидлива деловна средина, ќе ја зајакнат конкурентноста на компаниите и ќе овозможат побрзо приближување до единствениот европски пазар.
