Втор ден дебата за буџетот 2025 година – власта и опозцијата со различни ставови.За пратениците од опозицијата буџетот е неразвоен, додека за владејачкото мнозинство новиот буџет ќе донесе за граѓаните раст и подобар животен стандард. Од ВМРО ДПМНЕ велат дека со буџетот за следната година издвоен е рекоден износ за капитални инвестиции, а Македонија ќе биде претворена во градилиште.Со предлогот на власта ќе има повеќе пари за повисоки плати во вкупен износ од 10 милијарди денари повисоко од 2024 – здравствените и просветните работници ќе добијат најголемо покачување. А ќе има и повисоки пензии.
“Покрај зголемувањето на платите, со буџетот е предвидено и второто зголемување на пензиите почнувајќи од март за над 330 илјади пензионери во износ од 2.500 денари. Со ова го исполнуваме предизборното ветување за раст на пензиите за 5.000 денари линеарно за секој пензионер во првата година од мандатот.Со Буџетот за 2025 година издвоени се рекорден износ за капитални инвестиции, а Македонија ќе биде претворена во градилиште” – вели Бојан Стојановски, пратеник од ВМРО ДПМНЕ.
Поранешната директорка на УЈП, сега пратеничка, Сања Лукаревска се правда дека од 2022 до 2024 година буџетите кои биле носени од претходната власт биле во кризно време.Дафина Стојановска од ВМРО ДПМНЕ и реплицираше дека претходната власт била мајстроска во носење буџети во криза.Таа ги обвини дека злоупотребувале огромни финансиски средства и дека затоа ќе одговараат.
Инаку, државата до година планира да прибере 5,8 милијарди евра, а да потроши 6,5. Дефицитот ќе се движи на ниво од 4,4 % од БДП, а инфлацијата на ниво од 2,2 проценти.
Опозицијата која поднесе над 200 амандмани вели нема да го гласа буџетот бидејќи со него Владата само ќе ги задолжува граѓаните.
