Откако од СДСМ обвинија дека ВМРО-ДПМНЕ создава хаос во државата, од опозициската партија возвратија со остра реакција, обвинувајќи ги дека токму тие ја претвориле државата во руина и дека последиците од нивното владеење сè уште ги чувствува народот.
„СДСМ се дрзна да зборува за хаос?! Тие што ја оставија државата во урнатини?!“, прашуваат од ВМРО-ДПМНЕ, потенцирајќи дека хаосот во Македонија не започнал денес, туку е резултат на долгогодишно криминално, неодговорно и клиентелистичко владеење на СДСМ и нивните коалициски партнери.
Според ВМРО-ДПМНЕ, токму СДСМ е одговорна за претворањето на здравствениот систем во „бункер за тендери“ во време на министерувањето на Филипче, додека, како што велат, јавниот долг пораснал за над 3 милијарди евра – без реализација на клучни проекти. Обвинуваат и за тешки безбедносни пропусти, економски колапс, масовна емиграција и корупција на сите нивоа.
„Се сликавте со кокаин-кумови, додека улиците беа небезбедни. Ја уништивте економијата, иселивте 260.000 луѓе, ги заглавивте општините во долгови. И денес, без грам срам – зборувате за хаос?“, реагира ВМРО-ДПМНЕ.
Од партијата обвинуваат дека во отсуство на сериозно лидерство, викенд-соопштенијата на СДСМ ги пишуваат млади и неинформирани активисти со симпатии кон ликот и делото на Заев и Филипче.
„Нека се соочат со реалноста“, порачуваат од ВМРО-ДПМНЕ, обвинувајќи ги поранешните владејачки структури дека ја довеле државата до работ на банкрот, ја потопиле во корупција и ја претвориле во синоним за безредие.
Во реакцијата се посочува и трагедијата со модуларната болница, мито за извод од родени, инфлацијата, како и масовната сиромаштија што ја зафатила населението – како дел од „вистинското лице“ на владеењето на СДСМ.
На крајот, од ВМРО-ДПМНЕ ја споменуваат и европската агенда, оценувајќи дека францускиот предлог бил „заверен“ од Бујар Османи, додека СДСМ, како што тврдат, ја изгубила самостојноста и одлучувањето ѝ го препуштила на ДУИ.
