На изборниот митинг на Социјалистичката партија, на кој присуствуваше и лидерот и актуелен албански премиер Еди Рама, на крајот од своето обраќање Васил Стерјовски, кандидат за пратеник во оваа изборна единица, на македонски го честиташе Денот на македонскиот јазик.
„Почитувани пријатели, сакам да упатам честитка до македонската заедница по повод 5 Мај – Денот на македонскиот јазик и да порачам да го чуваме, негуваме и пренесуваме македонскиот јазик со љубов, гордост и достоинство“, рече Стерјовски, по што беше поздравен од илјадниците учесници на митингот.
Во обраќањето, тој на почеток се заблагодари на довербата да биде на кандидатката листа за округот Корча.
„Со срце полно благодарност, сакам да му се заблагодарам на премиерот Еди Рама и на политичкиот раководител на Социјалистичката партија за округот Корча, Нико Пелеши, за довербата и поддршката што ми ја дадоа на претставувањето на македонската заедница на победничката листа на Социјалистичката партија во овој округ“, рече тој.
„Се чувствувам длабоко почестен и привилегиран што сум дел од овој визионерски тим предводен од Влада што ја гледа иднината во Европската Унија, во развојот, вклученоста и еднаквоста за сите граѓани, без разлика“, додаде Стерјовски.
