Го поддржуваат Законот за заштита од пушењето, но имаат низа забелешки со цел да ги задржат вработените. Синдикатот СУТКОЗ кој ги опфаќа и вработените во секторите туризам и угостителство велат дека мора да има измени за да се спречи одливот на работници. Оттаму велат дека се повеќе вработени одлучуваат да прифатат сезонски ангажман во странство, па забраната за пушење дополнително може да го влоши проблемот.
„Треба да се најдат начини и мерки истиот да не придонесе за намалување на бројот на работници во овој сектор. Знаеме дека овие два сектори се дефицитарни со кадар, покрај ниските плати, дел од работниците ни заминуваат во странство. Така да сметаме дека и ова ќе биде еден вид на мал удар за исто така намалување на бројот на работници во овие два сектори“, вели Стојанче Кашиковски – претседател на СУТКОЗ.
Наместо забрана за пушење во затворени застаклени или тераси обложени со фолии, од СУТКОЗ бараат поригорозни контроли. Сметаат дека ако се дозволат посебни делови во угостителските објекти кадешто ќе може да се пуши, а повеќе инспектори вршат надзор, ќе бидат задоволени двете страни – и пушачите и непушачите.
„Знаеме дека и во досегашниот Закон кој што предвидуваше одредени простори за пушачите или така наречени тараси, предвидуваше значи таков дел кој што пушачите ќе бидат во можност да уживаат едностано во тоа нивно задоволство“ – вели Стојанче Кашиковски, претседател на СУТКОЗ.
Додека од Министерството за економија најавуваат нова средба со угостителите и Министерството за здравство за да се донесе одлука што ќе биде прифатлива за сите засегнати страни, лекарите бараат итна примена на законот. Бројките се застрашувачки. Границата за консумирање тутун во Македонија е намалена на 12 до 14 години и се повеќе млади деца почнуваат со користење тутун.
Инаку од Синдикатот ги поздравуваат и најавите за поригорозeн Закон за угостителство кој меѓу другото предвидува и построги правила за издавање лиценци и контроли за работа на угостителски објекти, бидејќи велат после трагедијата во Кочани, мора да се обезбеди и гарантира безбедноста и здравјето како на гостите, така и на вработените.
