Стара песна се пее во Судскиот и Советот на јавните обвинители. Спротивно на законите, и зад затворени врати си назначуваат луѓе во највисоките тела во правосудството. Сега решија да назначат четворица нови членови во Управниот одбор на Академијата за судии и јавни обвинители, кои не смеат да бидат дел од ова тело. Имено, тие се членови на судско-обвинтелските совети, па затоа не може да бидат и дел од управниот одбор, затоа што така моќта се концентрира во неколку личности. Тие или ќе бидат членови на советите, или во Академијата. Двете заедно не може. Друг проблем, е што додека се во советите, нивните функции им се во мирување, а само како активни судии и обвинители можат да бидат дел од Академијата.
- „Иако законот наведува дека истите треба да бидат избрани од редот на судиите и јавните обвинители. За жал, оваа е некоја лоша пракса која што ја имавме во минатото дека функциите не треба да се повторуваат дека членовите не треба да бидат членови и на УО на Академијата. За ова и за 2022 година реагираше и ДКСК, конкретно беше за назначување на членови од СС во Акдемијата и в.д. директор. По што беше констатирано дека постои судир на интереси“ вели Ивана Петровска од Коалиција „Сите за правично судење“.
Реакцијата следи откако во врвот на академијата беа ставени Ханиф Зендели и Антоанета Димовска од Судски и Душица Димитриеска и Башким Бесими од Советот на јавните обвинители, чии судско- обвинителски функции се во мирување. Коалицијата „Сите за правично судење“ бараат Антикорупциска да постапи за овој случај.
- „Ние ќе ја следиме ситуацијата и понатаму со оглед дека актуелниот состав на Акдемијата има мандат до крајот на ноември, а тука е и ДКСК за спречување на судир на интереси, кои се надевам дека ќе преземат дејствија по допрен глас. Но, секако до крајот на месецот ќе видиме дали Советите ќе се произнесат и ќе преземат нешто по ова прашање или ќе мораме да чекаме и ДКСК да се вклучи во целиот процес“ вели Ивана Петровска од Коалиција „Сите за правично судење“.
Ова не прво вакво назначување. Таков беше примерот и за Зоран Герасимовски кој во истоп време беше член на Судскиот совет, на Управниот одбор на Академијата и плус нејзин в.д. директор. По барање на антикоурпционерите, тој си поднесе неотповиклива оставка.
