Македонија е силно посветена на европските интеграции и реформите, ја продлабочува соработката во областа на безбедноста и одбраната, усогласена е со европското законодавство, што е составен дел од пристапниот процес.
Еврокомесарката за проширување Марта Кос изразила поддршката за патот на Македонија кон ЕУ и ја поздравила посветеноста на реформите и динамиката со која се спроведуваат.
Овие пораки стигнале на средбата помеѓу Кос и шефот на македонската дипломатија Муцунски кој во Брисел присуствувше на неформалниот состанок со неговите колеги од Западен Балкан и од земјите членки на ЕУ што го организираше високата претставничка на ЕУ за надворешни работи и безбедносна политика Каја Калас. Дипломатите разговарале за унапредување на соработката меѓу Европската унија и регионот, со акцент на безбедноста, одбраната, справувањето со хибридните закани и зајакнувањето на демократската отпорност. Муцунски порача – членството во Европската унија останува национален приоритет во надворешната политика и заедничка цел на целиот Западен Балкан
На средбата беше потврдена силната посветеност на државата на евроинтегративниот пат, континуитетот во реформските процеси, како и носењето на законите што се составен дел од овој процес. Разговорот беше насочен и кон заедничките безбедносни предизвици и продлабочувањето на соработката во областа на безбедноста и одбраната. Еврокомесарката Кос ја изрази поддршката за европскиот пат на Македонија и го поздрави континуитетот во реформите и фокусот на Владата по локалните избори, информираа од МНРНТ.
Владината делегација предводена од Муцунски заедно со скопскиот градоначалник Орце Ѓорѓиевски во рамки на посетата на Брисел ќе остварат средба и со еврокомесарот за култура. Со ова, ЕУ ја потврдува поддршката за реализација на проектот „Скопје – европски град на културата“.
Посетата следи по координативната средба помеѓу централната и локалната власт во Скопје, одржана во вторникот, на која беше потврдена заедничката стратегија за силно и современо претставување на главниот град на Македонија пред европските партнери.
