Жена на кислородна поддршка заглавена е во викендичка над хотелот „Радика“ во Маврово, но имаат агрегат за струја додека чекаат службите денеска да ги извлечат неа и нејзиниот сопруг и да ја префрлат во болница, соопштија од Центарот за управување со кризи.
„Договорено е околу 9 и 30 часот да се интервенира во чистење на делницата од 100 до 150 метри до влезната врата на викендицата за да може екипа од итната медицинска помош да ја преземе и транспортира пациентката до клиничката болница во Гостивар“, информираат од ЦУК.
Во село Леуново примен е повик од семејство од Кочани, а со нив и дете кое боледува од епилепсија, а родителите ја немале неопходната терапија со себе. Семејството било извлечено од селото, вчера во 17 часот и е вратено во Кочани во добра состојба.
Во драматично спасување извлечена е и бремена жена од селото Врбен. По информацијата дека семејства се заглавени во село Никифорово ангажирана е машина која дошла до селото во 18 часот и тие со сопствените возила се пробивале до пристапниот пат за да се упатат до своите домови.
