Собраниската Комисија за избори и именувања ја утврди предлог-листата за избор на нов претседател на Антикорупциската комисија. Адем Чучуљ е фаворитот што Комисијата ќе го предложи пред пратениците, откако во процесот на селекција ги доби највисоките оценки.
Селекциската комисија му додели 96,5 бодови – најмногу од сите пријавени – со што Чучуљ се пласираше на врвот на листата.
Тој речиси две децении работи во Антикорупциската комисија и моментално ја извршува функцијата генерален секретар. Комисијата за избори и именувања едногласно го поддржа неговото именување и ќе му го препорача на Собранието како кандидат за прв човек на ДКСК.
Според најавите од законодавниот дом, гласањето за оваа точка ќе се одржи на пленарна седница во првата половина на декември. Антикорупциската комисија добива нов претседател по оставката на Татјана Димитровска, која беше обвинета во случајот „Адитив“ за незаконско споделување службени информации и за фалсификување на сертификат за државна тајна.
