„Граѓани се собраа пред зградата на Основниот суд во Нови Сад, на повик на студентите, барајќи итно ослободување на сите, како што тврдат, приведени без докази за учество во антивладини протести.
Полицијата во Белград приведе 16 лица по протестите што синоќа се одржаа во повеќе градови низ Србија, пренесува Танјуг, повикувајќи се на информации од Министерството за внатрешни работи.
Како што јавуваат српските медиуми, лицата се приведени поради демолирање и палење на простории на владејачката Српска напредна партија во Белград. Иако протестите поминаа во помирна атмосфера за разлика од претходните денови, кога имаше директни судири меѓу антивладините демонстранти и приврзаниците на партијата на претседателот, министерот за внатрешни работи Ивица Дачиќ изјави дека на вчерашните протести во главниот град имало меѓу 2.300 и 2.400 „блокадери“ кои значително го нарушиле јавниот ред и мир.
Првично, Дачиќ соопшти дека се приведени петмина демонстранти, кои, според него, со својата агресивност покажале намера да демолираат, да палат и да ја нападнат полицијата.
Денеска беше одржана седница на Советот за национална безбедност, со која претседаваше претседателот на Србија, Александар Вучиќ. По седницата немаше изјави.“
