– Министерот за правда, Јетон Шасивари, денеска оствари средба со вршителот на должноста во Амбасадата на Државата Катар, Рашид бин Саед Ал-Хајарин, на која се разговараше за можностите за продлабочување на билатералните односи и отворање ново поглавје во институционалната соработка во областа на правосудството.
На средбата, како што соопшти Министерството за правда, Шасивари ја истакнал важноста од воспоставување директни контакти со Министерството за правда на Катар и неговите специјализирани институции, со фокус на обуката на правните професионалци, борбата против корупцијата и финансискиот криминал, како и дигитализацијата на правосудниот систем.
На средбата било посочено дека политичките консултации одржани во Доха во јули 2026 година и потпишувањето на Меморандумот за соработка во областа на трудот во септември годинава претставуваат основа за натамошно проширување на соработката меѓу двете земји.
Во таа насока, министерот Шасивари изразил интерес за разгледување на можностите за техничка и финансиска поддршка за приоритетни проекти во рамките на реформите во правосудството, со цел соработката да се преточи во конкретни проекти и мерливи резултати.
Од Министерството за правда посочуваат дека целта е билатералните односи со Катар да се унапредат преку конкретна институционална соработка, која ќе придонесе за зајакнување на капацитетите на институциите и остварување придобивки за граѓаните на двете земји.
