Стогодишната успешна приказна за постоењето на македонскиот бренд на пиварската индустрија, Прилепската пиварница, денеска ја одбележа со донација и засадување на 100 дабови садници. Еко-акцијата се спроведе крај Манастирот „Св. Димитрија“, каде пред неколку години голем шумски пожар проголта неколку стотици хектари шума, а беше загрозен и самиот манастир.
„Ја продолжуваме нашата зелена агенда која што е топ-приоритет во нашето постоење и во нашето работење последниве неколку години со тоа што се грижиме за заштита на животната средина, на почвата, на водата и на воздухот со континуирани активности и со континуирани инвестиции во намалување на отпадните води, во намалување на грамажата на пет-амбалажата, во намалување на испуштањето на штетни гасови во воздухот“, – изјави Сашо Самарџиоски, генерален директор на Прилепска пиварница.
„Бројката 100 е заради годишнината, а дабовите дрвја се синоним на еден од нашите брендови – „Златен даб“, објаснува Самарџиоски и додава дека во Македонија малубројни се компаниите кои можат да се пофалат со вакви јубилеи, особено во пиварската индустрија. Турбулентни времиња низ десетте децении, но и сега им задавале сериозни удари, но посветената работа, ги одржувала речиси секогаш на врвот.
„Крали Марко“ е еден од брендовите со кои е започнта Прилепска пиварница така што како бренд постои веќе сто години. Имаме доста млада екипа, млад тим, а менаџерскиот тим се труди да даде максимум во овие тешки, турбулентни времиња да ја одржи фирмата во добра финансиска состојба“ – посочува Самарџиоски.
Ваквите еко-акции се од особено значење и за самата локална зедница, особено кога во нив се вклучуваат општествено-одговорни компании, како позитивен и авангарден пример за сите останати чинители, велат од ЛС Прилеп, кои и самите зедоа учество во денешната акција.
„Секоја година општината и заедно со неа сите активисти, општествено-одговорни компании активно придонесуваме за збогатување на раститетлниот свет околу Прилеп“, – истакна Борче Јовчески, градоначалник на Прилеп.
Инаку, првиот човек на Прилепската пиварница, очекува дека после изборите, во Македонија ќе се формира стабилна Влада чиј прв и главен приоритет ќе биде заздравувањето на домашната економија, која во последниве неколку години се соочува со бројни тешки предизвици, опстојувајќи на работ од рентабилноста.
Каролина Дурло
