Почина познатиот македонски музичар Владимир Блажев – Панчо, од дуото „ДНК“, кој беше тешко повреден во пожарот што се случи ноќта на 16 март оваа година во дискотека „Пулс“ во Кочани, и оттогаш се лекуваше во приватна болница во Скопје. Долготрајната битка со повредите Панчо ја загуби утринава, нешто пред 10 часот и 30 минути.
„Длабоко сочувствуваме со семејството на Панчо, неговите најблиски, како и со целата македонска јавност, бидејќи загубата е огромна за сите нас. Почитувајќи ја приватноста на секој наш пациент и согласно Законот за заштита на правата на пациентите, не споделуваме информации за пациентите“, соопштија од приватната болница „Систина“.
Од Јавното обвинителство информираа дека ќе биде издадена наредба за обдукција на телото на пејачот Владимир Блажев – Панчо, кој почина по речиси седум месеци болничко лекување.
Панчо беше единствениот преживеан од главната постава на „ДНК“, но претрпе тешки изгореници и оштетување на трахеата поради вдишување на чад. Роден е на 29 јули 1979 година во Скопје. Пред да го сними првиот сингл со Андреј Ѓорѓиески за дуото „ДНК“ во 2001 година, беше член на „ОК бенд“. Дуото сними шест албуми и важеше за едно од најпопуларните на македонската музичка сцена.
