Почната е целосна реконструкција на спортската училишна сала во ООУ „Панајот Гиновски” во општина Бутел, која е стара 70 години, соопшти градоначалникот Дарко Костовски.
-Со поддршка на Министерството за образование и наука ќе го реализираме овој значаен проект за учениците од ООУ „Панајот Гиновски”. По 70 години старата дотраена спортска сала ќе замине во историја. Со реконструкцијата ќе биде поставен целосно нов под со нова подлога. Ќе се добијат и нови соблекувални, а ќе се реконструираат и санитарните јазли, објави Костовски на неговиот фејсбук-профил.
Костовски вели дека со реконструкцијата ќе бидат обезбедени квалитетни услови за сите училишни спортови и за непречено одвивање на наставата по физичко и здравствено образование.
-Наскоро ќе почне и доградбата на ова општинско основно училиште со што ќе се овозможиме одвивање на наставата во една смена. Вложуваме во капитални проекти кои ќе го подобрат квалитетот на образовниот процес на нашите деца, додава Костовски во објавата на Фејсбук.
