Пет кандидати за градоначалници ветуваат дека ќе го унапредат живеењето во скопски Аеродром. Оваа општина има најголем проблем со загадувањето и комуналниот отпад. Затоа и голем дел од кампањата, кандидатите за градоначалници ја посветија на идеи за нивно решевање.
Дејан Митески од ВМРО-ДПМНЕ се бори за да продолжи да управува со Аеродром. Митески за борба против загадувањето најави гасна когенеративна централа, парно греење во населбите Лисиче, Горно и Долно Лисиче, како и зајакнување на инспекциите за да не се создаваат нови депонии, фотоволтаици на секоја зграда и куќа, нов спортски центар на кејот на Вардар.
За кандидатот на СДСМ, Александар Трајановски, Аеродром треба да прерасне во скопска гордост, а не дива депонија. Дел од програмата е и реформа на јавните претпријатија, крај на листите за чекање за упис на деца во градинките. Во здравството најголем новитет е воведување локален сервис за парамедицинска помош, што според него е потребно заради долгите чекања на брзата помош.
Економистот Марјан Димитриев е адутот на Левица за Аеродром. Во неговата програма стои дека прво ќе изврши ревизија и измена на ДУП-ови, особено за поранешната касарна, но со целосна забрана за градење станови. Тој планира да отвори природно-математичка гимназија, дом на култура и технопарк, како и чаршија која ќе биде културно јадро на општината.
Кандидатот за градоначалник поддржан од ТМРО, Владимир Михајловски – Лепак, остварува повеќе средби со граѓаните на општината. Михајловски разговара за нивните проблеми, а понуди и своја програма за развој на општината. Тој смета дека општината треба да стане многу почиста и многу посредена. Меѓу проектите кои ги предвидува е решение за пазарот во општината.
Дејан Лазаревски од ЛДП е кандидат на коалицијата „Искуство за успех“. Тој најавува помош од 12 илјади денари за новороденче, субвенционирање на лифтови во згради под 6 ката, мост на Вардар помеѓу Аеродром и Гази Баба, полициски патроли и субвенционирање на еден оброк во училиштата, подземни контејнери.
Во Советот на општина Аеродром има 27 членови. На овие локални избори поднесени се 10 листи за советници со 270 кандидати.
