Од обилните дождови поплавени се домови, земјоделски површини и патишта во некои делови од државата. По сушното лето, ноемврискиот дожд е добредојден за почвата, но донесе и проблеми.
Центарот за управување со кризи (ЦУК) информира дека има поплавени домови и земјоделски површини, како и одрони на патишта во дел од државата.
Во општина Ресен, како последица на обилните врнежи, дошло до излевање на реките Болнска и Источка во селата Царев Двор и Дрмени, при што се поплавени над 50 куќи, магацински простории, визби и земјоделски површини.
Во општина Битола се пријавуваат повеќе интервенции – се градат насипи на надојдената река Драгор, се интервенира кај подпелистерските села, се расчистуваат патиштата од наносите од вода, а се пријавени и прекини на водоснабдувањето.
Во општина Демир Хисар, од излевање на река Црна кај село Жван се поплавени земјоделски површини, а надлежните екипи расчистуваат одрони на локалните патишта.
Во општина Прилеп, пак, преку Е-112 е пријавено дека паднал таван на куќа како последица од дождовите.
Регионалниот центар за управување со кризи – Охрид – извршил повеќе интервенции на поплавени домови.
По престанокот на дождот, состојбата е стабилизирана, но реките и понатаму се на високо ниво. Се расчистуваат повеќе одрони и на регионалните патишта, во Крива Паланка и Кратово, а одрони има и на патот Струмица–Валандово.
Во Скопје, нивото на реките е покачено, но според ЦУК, состојбата е под контрола и без излевања.
