Дипломатската офанзива на македонската Влада кон Брисел дава резултати. По денови блокади на товарните премини, сообраќајот се нормализира, а премиерот Мицкоски најави дека државата е на чекор до изнаоѓање на трајно решение за проблемите на транспортерите. Заедно со вицепремиерот Николоски, изминатиот период правеа напори за изнаоѓање на решение за проблемот кој беше наследен од претходните влади, а преку средби со високи челници на Европската комисија и земјите од регионот бил направен заеднички притисок кон Европската унија.
„Овој проблем со транспортерите е еден од многуте наследени од порано, важно е дека имавме дипломатска офанзива здружена со земјите од регионот важно е дека препознаен е проблемот, има неколку можни решенија и очекувам да се катализира решение со кое ќе се надмине овој проблем, но тука не застануваат проблемите следно е квотите за челикот“, изјави премиерот на Македонија, Христијан Мицкоски.
Во меѓувреме, транспортерите очекуваат трајно решение и велат дека надежта ја полагаат во ресорните министерства и во состанокот со Европската комисија закажан за вторник, на 3 февруари. Домашните превозници информираат дека за време на блокадите биле заглавени стотици камиони, што предизвика застој во испораката на суровини, храна и индустриски производи.
„Очекуваме од ЕУ во прво време да не се бројат деновите на нашите членови, а до април и трајно да се реши проблемот. Најавена е средба на министрите од сите држави кои учествуваа на протестот за вторник и од таа средба зависат многу работи“, изјави Билјана Муратовска, генерален секретар на „Макам транс“.
Македонија и Црна Гора веќе ги прекинаа блокадите на граничните премини, додека превозниците од Србија и Босна и Херцеговина најавуваат дека ќе продолжат со протестите сè додека не добијат конкретни гаранции од Брисел. Во меѓувреме, Европската комисија најави нова визна стратегија со пофлексибилни правила за прекуграничните работници, а професионалните возачи ќе бидат третирани како посебна категорија.
