Министерот за спорт, Борко Ристовски, заедно со претседателот на Владата, Христијан Мицкоски и со вицепремиерот и министер за политички систем, Љупчо Димовски, денеска присуствуваше на свеченото отворање на Меѓународниот карате турнир „Гранд при Скопје“, што се одржува во спортската сала на ООУ „Антон Димитров“ во населбата Бутел, во организација на КК „Цветан Димов“.
Овој голем спортски настан, како што информираат од Министерството за спорт, втора година по ред се одржува во чест и во спомен на Игор Лазарев – истакнат карате судија со највисока светска лиценца и човек кој остави длабока трага во македонското карате и во спортската заедница.
-Турнирот обединува 523 каратисти со вкупно 712 натпреварувачки влезови, претставници на 67 клуба од 15 држави. Македонија оваа година ќе ја претставуваат 378 каратисти со 490 натпреварувачки влезови. Тоа е уште една потврда за високото реноме што го има турнирот, традицијата што ја негува КК „Цветан Димов“ и за популарноста на овој спорт во Македонија, соопшти Министерството за спорт.
Министерот Ристовски, се вели во соопштението, упати честитки до организаторите и им посака успешен настап и фер борби на сите учесници, истакнувајќи дека карате спортот претставува важен сегмент од спортската култура и воспитување на младите генерации.
