Не сум сигурен дека целата опозиција е заинтересирана за предвремени парламентарни избори, но ако се договориме, ние сме секогаш подготвени за избори, изјави денеска премиерот Христијан Мицкоски.
Одговарајќи на прашањето за информациите дека Арбен Таравари би можел да ја напушти коалицијата Вреди и владината коалиција пред локалните избори, Мицкоски посочи дека нема такви информации и додаде дека владината коалиција функционира одлично.
„Немам такви информации дека ќе ја напушти владината коалиција и коалицијата Вреди. Напротив, мислам дека владината коалиција функционира одлично. За тоа како ќе се позиционира коалицијата Вреди во однос на локалните избори, тоа прашање треба да го упатите на нив“, истакна Мицкоски, одговарајќи на новинарски прашања по поставувањето на камен-темелникот на мега-паркот со плоштад во населба Радишани.
Во однос на прашањето за присуството на вицепремиерот Иван Стоилковиќ на настан против НАТО во Белград, Мицкоски рече дека не го гледа тоа на тој начин.
„Не би го гледал ова низ таа оптика како што вие го кажавте, но за постапките и начинот на кој господинот Стоилковиќ е таму, можеби е најдобро него да го прашате“, изјави Мицкоски.
Министерот за здравство, Арбен Таравари, одговарајќи на новинарско прашање во врска со објавите дека ќе ја напушти функцијата до Април, изјави дека односите меѓу партнерите во коалицијата се стабилни и дека продолжува да ја извршува функцијата министер за здравство.
