Во Општина Пробиштип по 12 пат ќе се одржи манифестацијата „Зелникот на баба“. Раде Илиевски вработен во општина Пробиштип вели дека и годинава се очекува богата културно-уметничка програма, а гости ќе има од целата држава, Србија и од Бугарија. Mанифестацијата е предвидена за 21 март, сабота, а како што вели Илиевски собраните средства од продажбата на зелниците ќе бидат наменети за хуманитарни цели.
-И годинава има заинтересирани за учество од цела Македонија, а имаме заинтересирани и од Србијаи од Бугарија. Манифестацијата ќе опфати понуда од голем број на специјалитети од тесто со претежно зелници и други изработки од теста. Интересно е што манифстацијата опфаќа натпревар во брзо сукање, особено буди интерес кај присутните овој натпревар и бираме најдобро украсена етно маса, а битно е што целата продажба на сите понудени производи ќе биде наменета за хуманитарни цели-рече Илиевски.
Манифестацијата е стара 15 години, но поради ковид пандемијата и трагедијата во Кочани, тој вели три години истата не се одржувала. Дополнително посочи дека победниците ќе добијат специјален трофеј наменски направен за зелникот на баба.
– Вообичаено, како и сите претходни години и оваа година ќе има познати уметници од Македонија кој ќе ја веселат публиката-вели Илиевски.
