Измените на Кривичниот законик со кои над 200 случаи со висока корупција паднаа во вода, политичките притисоци врз Врховниот суд, аферите во Судскиот совет, скандалозното постапување на институциите по упадот во македонска навигација, партиските вработувања. Ова се парчиањата од сложувалката кои ја даваат очајна слика на судско обвинителскиот систем во кој граѓаните имаат доверба од само 1%.
Во извештајот на Транспаренси интернепшенл Македонија е на 76 место за перцепција за корупција од 180 рангирани земји, тоа е за 9 позиции подобро од претходната година, но во најголем дел поради влошувањето во други земји, оценката за нас останува речиси иста.
Овие резултати се далеку од охрабрувачки, вели претседателот на Транспаренси, Благоја Пандиловски.
Најголем проблем во борбата против корупцијата и во овој извештај е правосуството. Оценската мисија на ЕУ која влезе во највисокото тело на правосудниот систем даде дури 40 препораки, а во Извештајот се нотирани и политичките притисоци за кои се жалеше претседателката на Врховниот суд, Беса Адеми. Црна дамка во Извештајот е Собранието кое со измените за злоупотребата на службената положба за лична корист и скратените рокови за покренување постапка за сомнителни случаи на корупција е голема услуга за корумпираните луѓе, стои во Извештајот.
Според документот, проценката е дека 200 случаи ќе бидат отфрлени, вклучително и оние против поранешни високи функционери. Исто така, се нотира дополнителна загриженост за способноста на судството ефикасно да се бори против корупцијата поради политички назначувања и разрешувања на судии.
Од регионот, подобро рангирани од Македонија се Словенија, Хрватска, Грција, Црна Гора и Бугарија, додека Косово, Албанија, Србија и БиХ се со послаби резултати за перцепцијата за борбата против корупцијата.
Македонија својата позиција ја дели со Молдавија, Унгарија, Куба, Кина, Бахраин, и Тринидад и Тобаго.
