Лидерите од земјите од Западен Балкан утре ќе се сретнат на самит во рамки на иницијативата „Брдо-Бриони“, што ќе се одржи во албанскиот град Драч.
Главна тема на разговорите ќе биде европската перспектива на Западен Балкан, со посебен фокус на Планот за раст, кој претставува финансиски инструмент на ЕУ за периодот 2024–2027 година. Планот вклучува вкупно шест милијарди евра, од кои четири се во форма на заеми, додека две милијарди се неповратни грантови.
Секоја земја има своја реформска агенда, чијашто реализација е услов за добивање на средствата.
На самитот во Драч од Македонија ќе присуствува претседателката Гордана Сиљановска-Давкова. Потврдено е учеството и на претседателите на:
- Црна Гора – Јаков Милатовиќ
- Србија – Александар Вучиќ
- Косово – Вјоса Османи
како и на членовите на Претседателството на Босна и Херцеговина: Жељка Цвијановиќ, Денис Беќировиќ и Жељко Комшиќ.
Целта на иницијативата „Брдо-Бриони“ е да се поттикне меѓусебната соработка и да се олеснат напорите на земјите од регионот на нивниот пат кон Европската унија.
