Скопскиот кривичен суд донесе мерки притвор за осомничените во случајот со големиот пожар во објектот за електронски отпад во Трубарево.
На првоосомничениот, кој иако формално не бил управител на фирмата, реално го организирал целото работење, му е одреден 30-дневен притвор. Неговата ќерка, која е формално запишана како управител, заедно со уште двајца осомничени добија мерка куќен притвор.
Обвинителството ги товари за кривично дело „загрозување на животната средина и природата со отпад“. Според обвинението, првоосомничениот и ќерката се третираат како соизвршители, додека третото лице – раководител на подружница – постапувал по негови насоки и им ги распоредувал задачите на вработените. Четвртиот осомничен, иако формално не бил вработен во фирмата, преземал дејствија за организирање на одлагањето на отпадот.
Од Обвинителството најавуваат дека истрагата продолжува и за евентуална одговорност на други лица.
