Повторно угинати животни во скопската Зоолошка градина – овој пат станува збор за две лами, соопшти советникот во Град Скопје, Дарко Кирков. Тој тврди дека Зоолошката го крие случајот, а состојбата внатре ја опишува како „вистински хорор“.
Кирков потсетува дека „откако Арсовска дојде на чело на Скопје и со поставување на нејзините ‘професионални’ кадри за директори, во скопската Зоолошка угинаа повеќе од 40 егзотични животни, а дел од нив под сомнителни околности“.
Советникот посочува дека пред само еден месец починале уште две лами, за кои „се знаело, наводно, дека боледуваат од туберкулоза“. Според него, вработените биле изложени на ризик и притисок, а истовремено и посетителите.
„Неколку дена претходно, вработените имале голем притисок и мобинг од горенаведените да влегуваат во живеалиштата на ламите без никаква ХТЗ или заштитна опрема“, вели Кирков и предупредува дека симптомите кај животните биле „видливи“, а тие не биле изолирани.
Кирков тврди дека директорот во сенка, Стаменов, заедно со директорот на хартија, Попов, наредиле информацијата за угинувањето на ламите да се сокрие и да не се објавува.
„До таму идат што и покрај законската обврска да ја известат АХВ, тие тоа не го прават. АХВ дозна утрово од мене“, вели тој.
На крај, тој јавно ја прашува градоначалничката: „Данела Арсовска, што уште ќе му направиш на Скопје?“
