Министерката за образование и наука, Весна Јаневска, изјави дека не очекува недостиг од наставници за прво до петто одделение по усвојувањето на Законот за основно образование.
Според новите измени, наставниците со диплома за педагог ќе можат да предаваат само од прво до трето одделение, додека оние со диплома за одделенска настава ќе имаат можност да работат од прво до петто одделение. Дел од наставниците веќе започнаа петиција со барање да се задржи претходното законско решение, стравувајќи од можноста да останат без часови.
Јаневска нагласи дека Министерството за образование и наука (МОН) веќе направило анализа и не очекува недостиг од наставници, бидејќи тие ќе имаат можност да работат и во дневен престој. Сепак, како што посочи, ако се појави потреба, пратениците ќе можат да предложат амандмани, а Министерството ќе разгледа можност за мала измена во Законот за основно образование.
