Најмалку 180 лица се повредени во иранските ракетни напади врз јужните израелски градови Арад и Димона, во текот на ноќта, каде што се наоѓа главниот нуклеарен објект на земјата.
Иранската војска, пак, соопшти дека успешно извршила напад врз аеродромот Бен Гурион во Тел Авив, користејќи дронови Арш 2.
Како што соопштуваат од иранската страна, нападот бил одговор на претходен напад врз иранскиот комплекс за збогатување на ураниум Натаназ.
Израелскиот премиер Бенјамин Нетанјаху изјави дека земјата поминала низ тешка вечер по иранските напади и дека Израел нема да се откаже од нападите против непријателите.
„Одлучни сме да продолжиме да ги напаѓаме нашите непријатели на сите фронтови“, изјави премиерот на Израел, Бенјамин Нетанјаху.
Израелското Министерство за здравство објави дека најмалку 116 лица се повредени во Арад, од кои седум се во тешка состојба. Најмалку 64 лица се повредени во Димона, од кои едно е во тешка состојба.
Иранската војска објави дека ќе ги нападне енергетските инфраструктури и постројките за десалинизација, доколку американскиот претседател Трамп ја оствари својата закана за уништување на термоцентралите на Иран.
„Доколку непријателот ја нападне нафтената и енергетската инфраструктура на Иран, целта ќе биде целата енергетска, информатичка и инфраструктура за десалинизација што им припаѓа на САД и на режимот во регионот“, изјави Хатам Али Анбија, портпаролот на оперативната команда на иранската војска.
Оваа изјава доаѓа откако претходно американскиот претседател Доналд Трамп му даде рок од 48 часа на Иран да го отвори Ормутскиот теснец или ќе се соочи со уништување на електраните.
„Доколку Иран не ја отвори целосно, без закани, Ормутската Теснина во рок од 48 часа од овој момент, САД ќе ги нападнат и ќе ги уништат нивните електрани“, изјави Доналд Трамп, претседател на САД преку социјалните мрежи.
Додека Иран сè уште добива поголем дел од водата од реките и подземните води, заливските земји, вклучувајќи ги и Обединетите Арапски Емирати, се во голема мера зависни од десалинизацијата – процес на претворање на морската вода во вода за пиење. Сето ова го поставува клучното прашање дали оваа закана на Иран ќе предизвика нови конфликти во регионот, кој од полето на нафтата би можел да се префрли во полето на водата. Дали Блискиот Исток и светот ги очекува нова криза, но овој пат криза со водата?
Мишко Ливрински