Во празничниот дух на новогодишните и божиќните денови, во рамките на манифестацијата „Украсуваме по скопски“ беа избрани најубаво украсената тераса, најубаво украсениот двор во Скопје и најубав ученички расказ. Преку оваа иницијатива се истакнуваат креативноста и посветеноста на граѓаните кои со своите домови создадоа топла, светла и автентична празнична атмосфера воградот, информираат од Град Скопје.
– По детаљна евалуација и теренска посета на сите пријавени учесници, жири-комисијата ги избра највпечатливите празнични уредувања, каде што вниманието кон деталите, креативниот пристап и љубовта кон празниците беа јасно препознатливи. За најубаво новогодишно украсен двор од индивидуална станбена куќа беше избрана Адријана Јовановиќ, улица Темко Попов бр. 33а, населба Маџари – двор што зрачеше со топлина, светлина и вистинска празнична магија. Награда: 20.000 денари. За најубаво новогодишно украсена тераса од стан беше избрана Теа Ивановска, улица Митрополит Теодосиј Гологанов бр. 149-2/7, населба Козле – пример како и мал простор може да стане голема празнична приказна. Награда: 20.000 денари. Во категоријата најубав расказ на тема „Новогодишни желби и празнувања“ наградата ја освои Христина Наумов, ученичка во СУГС „Ѓорѓи Димитров“, со искрен и инспиративен текст што ги пренесува празничната надеж и детската радост. Награда 5.000 денари, пишува градоначалникот на град Скопј,е Орце Ѓорѓиевски, на „Фејсбук“.
Тој додава дека изборот го направила жири-комисија составена од реномирани новинари и медиумски професионалци.
Со „Украсуваме по скопски“, нагласува тој, Скопје уште еднаш покажува дека најубавите празници се оние што ги создаваме заедно.
– Светлината, креативноста и желбата за убаво секојдневие започнуваат од домот, а се шират во целиот град. Скопје го разубавуваме заедно. По скопски! Светлината на празниците доаѓа од домовите – избрани најубаво украсените дворови и тераси во Скопје. Во магијата на новогодишните и божиќните празници Скопје блесна со посебна топлина, онаа што доаѓа од домовите на граѓаните – пишува Ѓорѓиевски.
Според него, оваа манифестација била посветена на поттикнување на граѓаните активно да учествуваат во создавањето на празничниот амбиент претворајќи ги своите домови во мали светлосни приказни што го разубавуваат секое маало и ја прават празничната атмосфера на Скопје потопла, поблиска и поискрена.
