Најновото истражување на јавното мислење, објавено од порталот МКД.мк, а реализирано од агенцијата „Маркет вижн“, покажува силно изразено незадоволство кај граѓаните од функционирањето на македонскиот правосуден систем. Резултатите укажуваат дека довербата во судиите и јавните обвинители останува ниска, а мнозинството испитаници не сметаат дека тие заслужуваат повисоки плати.
Според анкетата, дури 73,6 проценти од граѓаните се изјасниле против зголемување на платите на судиите и јавните обвинители. Наспроти тоа, само 14,8 проценти од испитаниците оцениле дека дополнителните средства за правосудството се оправдани. Доминира ставот дека финансиското подобрување нема да донесе суштински промени и дека состојбата во судството нема значително да се поправи со повисоки примања.
Истражувањето опфаќа и оценки за работата на државниот јавен обвинител Љупчо Коцевски. Негативна оценка за неговиот ангажман дале 42,3 проценти од анкетираните, додека 22,2 проценти сметаат дека тој соодветно ја извршува функцијата. Значителен дел од јавноста, речиси 40 проценти, се изјаснил дека Коцевски треба да биде разрешен од функцијата.
Анкетата е спроведена во периодот од 25 ноември до 6 декември 2025 година, преку CATI методологија – телефонско анкетирање со компјутерска поддршка. Истражувањето е реализирано на примерок од 1.200 испитаници, кој е репрезентативен на национално ниво според регионалната распределба, полот и возрасната структура на населението.
