Кривичниот совет на Основниот суд во Битола го прифати предлогот на Основното јавно обвинителство и на осомничениот сопственик на фирмата „Марковски Компани“, Борче Марковски, му определи мерка притвор. Со оваа одлука, судот ја уважи жалбата на обвинителството и ја преиначи првичната одлука на судијата на претходна постапка, кој претходно определил полесна мерка.
Од битолското обвинителство информираат дека судот ги прифатил нивните аргументи, особено во делот на ризикот од бегство на осомничениот кој имал и имот во странство.
„Со ова е уважена жалбата и аргументите изнесени од обвинителството, особено во поглед на ризикот од бегство на осомничениот“, стои во соопштението.
Обвинителството дополнително информира дека сè уште не е добиено известување за исходот на жалбата што ја поднело за мерката куќен притвор одредена за осомничениот раководител во РЕК „Битола“. Првичната одлука на судот предизвика бура реакции во јавноста.
Станува збор за компанија која во периодот на претходната власт добивала тендери во вредност до стотици милиони. Последниот случај за кој е отворена истрага и за кој сопственикот на „Марковски Компани“ заврши во затворски притвор е за тендер со кој државниот буџет бил оштетен за 100 милиони денари.
