За влакно избегнат судар на два авиони над скопскиот аеродром. Пред шест дена авион на „Туркиш ерлајнс“, кој летал од Мадрид до Истанбул и патнички авион на „Санекспрес“ кој од турскиот крајбрежен аеродром Даламан летал за Лондон, за малку ќе се судреле над скопско Миладиновци во 18 часот и 32 минути.
Тоа може да се види и на смимката на веб страната за следење летови Флајтрадар24, која упатува дека ќе дошло до судир на двата авиони во близина на скопскиот аеродром. Непосредно пред да се разминат и двата авиони се наоѓале на иста височина од 36 илјади стапки, а 30 секунди пред да се разминат едниот се авион спуштил 250 стапки а вториот се кренал за 325 стапки нагоре и така била избегната опасноста.
Потврда за ова стигна од Македонската навигација од каде велат дека уште на 7-ми септември во 18 часот и 30 минути имало пријава за избегнат инцидент.
- „На 7 септември во 18.30 часот поднесена е пријава за безбедосен настан во пропишаниот рок од извршителите кои работеле на засегнатиот сектор. Согласно правилата и пропишаните процедури, пријавата е регистрирана од страна на одделението ИМС (Integrated Management Systems) и доставена до Агенцијата за Цивилно Воздухопловство. Исто така, согласно важечките процедури, од страна на одделението ИМС (Integrated Management Systems) отворена е истрага за утврдување на фактичката состојба и причините за настанот. Би сакале да укажеме дека ваквите настани како и секаде во Европа, секогаш се навремено пријавени и процесирани од сите релевантни одделенија, служби и институции, согласно постоечките правни процедури“, наведе М-НАВ во соопштение.
Претходно од Агенцијата за цивилно водухопловство потврдија дека постапуваат по настан пријавен од М-НАВ.
Давателот на навигациски услиги М-НAВ уредно го пријави настанот и АЦВ ќе постапи по истиот, изјавија од АЦВ за МИА.
Надлежните инспектори за безбедност во авиосообраќајот ќе влезат во контролата за летање за да истражат што точно се случувало на 7-ми септември.
- „В понеделник ќе влеземе во М-НАВ и ќе ги направиме потребните разговори, ќе ги преслушаме снимките од комуникацијата помеѓу контролорите и пилотите на авиони, како и ќе ги прегледаме видеозаписите. Наша цел не е да утврдуваме вина, туку да идентификуваме причината која довела до инцидентот. Исто така, ќе побараме изјави од пилотите на двата авиона преку нивните воздухопловни власти и ќе ја информираме јавноста. Сè друго во моментот би било шпекулација,“ изјави Зоран Илиевски, претседателот на КИНСИВ за МИА.
Според процедурите и безбедносните мерки во авиосообраќајот, меѓу авионите треба да има 2.000 стапки вертикална оддалеченост, што не било испочитувано во овој случај.
