Да бидеме обединети и сплотени за да го сочуваме она што го наследивме од оние кои тргнаа во востанички марш, водени од јасна визија и спремни на жртвување во ослободителната мисија. Ваква порака по повод 11 Октомври – Денот на народното востание испрати претседателката на државата, Гордана Сиљановска-Давкова.
Овој празник, според Сиљановска-Давкова, е потсетник на храброста и пожртвуваноста на генерациите кои ја извојуваа слободата и ја создадоа македонската држава.
– На денешниов голем празник уште еднаш им оддаваме почит на оние кои пред 84 години тргнаа во тежок и храбар востанички марш, жртвувајќи се за ослободувањето на татковината и создавањето македонска држава на рамноправни граѓани – порача претседателката.
Во драматичните денови на Втората светска војна покажавме дека обединети и сплотени, без оглед на социјалната, етничката, верската, идеолошката или друга припадност, можеме да ги победиме силата и неправдата. Затоа, прославата на 11 Октомври не е само потсетување на една славна епопеја, туку и повик за нејзино продолжување – со дијалог и во мир.
Сиљановска-Давкова предупреди дека живееме во тегобно време на војни и воени закани, срамни за 21 век. Битисуваме оптоварени со суштински проблеми во остварувањето на правото, правдата, хуманоста и солидарноста. Исправени сме пред нови предизвици, несвојствени за демократијата. Од нас се бараат илинденска и партизанска зрелост, мудрост и храброст во донесувањето на клучни одлуки – нагласи македонската претседателка, повикувајќи на обединетост и сплотеност.
